تەورات و ئنجیل پیرۆز و زاراوەێ خوارێن کوردی پەێوەندی قۊلێگ وە دریژاێەتی بان چوارسەد ساڵ وە گەرد یەکا دێرن. ئێ زاراوە لە زوان کوردی ک جقرافیاێ قسیەکەرەیلێ کەفێدنەو بەش باشوورین وڵات کوردەواری لە ناوچەیل مەرزی لە ناوهەێن وڵاتەیل ئێران و عراق، لە سینێ هەڵگر بەشەیل گەوراێگ لە مەسڵەتەیل و مەتەڵەیل و ڕاوهاتەیل و تاهەێ کەساێەتیەیل ناودار کتاو پیرۆزە، ک ئمڕوو فرەتر لە ناو چیرۆکەیل و مەسڵەتەیل ئەدەبیات فولکلور ئەو وەر چەو کەفن. هەرسەێ زوورم قسیەکەرەیل ئێ زاراوە لە زوان کوردی، ک فرەتر نیشتەجێ شارەیلێگ وێنەێ کرماشان و ئیلام و خانەقین و ئسڵاماباد و ئەێوان و مەنەلی و ئاوای و ناوچەیل دەوراگردێانن، لە ڕوانگەێ ئائینیەو سەر وە مەزەهەبەیل شیعە و یارسانن، ئمان کاریگەری ئەدەبیات ئنجیلی و تەوراتی لە سەر فولکلور باو لە ئێ زاراوە و بن زاراوەگانێ حاشاهەڵمەگرە.
ئێ وەرگێڕانە لە ئنجیل، لە ڕاسیا چەنمین هەوڵ ئڕا تەرجومەێ کتاو پیرۆز وە ئێ زاراوەسە. وە ئمێد یەوە ک وە برەکەت باوگ ئاسمانی ئێ کارە وە سەرکەفتنەو باێدنەو پەرتخ و سەرجەم کتاو پیرۆز بنریەێدن لە وەر دەس خۆێنەرەیل کورد خوارێن.
